بۇگىندە جامبىل وبلىسىن ايشىقتاۋ ماقساتىندا قولدانىلىپ جۇرگەن ەلتاڭباسى ءوڭىردىڭ قۇرىلعانىنا 60 جىل تولۋى قارساڭىندا 1999 جىلى 23-شىلدەدە بەكىتىلگەن. وبلىستىڭ ەلتاڭباسىنىڭ اۆتورى قازاقستان رەسپۋبليكاسى ساۋلەتشىلەر وداعىنىڭ مۇشەسى سالاۋات دەمباي بولىپ تابىلادى دەپ جازادى Qamshy.kz اقپارات اگەنتتىگى. 

ارحيۆتە ساقتالعان جامبىل وبلىستىق ءماسليحاتى مەن وبلىس اكىمىنىڭ شەشىمىنە №1قوسىمشادا ەلتاڭبا جايىندا تولىق سيپاتتاما بەرىلگەن. مۇنداعى تولقىن مەن سۋ بەينەسى وبلىس اۋماعىنداعى شۋ مەن تالاس وزەندەرىنىڭ ايدىندى شالقارىن ايشىقتايدى. سونداي-اق ەلتاڭبادا وبلىستا ورنالاسقان الاتاۋ مەن قاراتاۋدىڭ بيىك شىڭدارىن، اسقاقتىعىن تاڭبالايتىن سيمۆولدار دا ۇيلەسىممەن ورىن تاپقان. سونىمەن قاتار وبلىستىڭ ەلتاڭباسىندا ءارتۇرلى سيمۆولدارمەن ىنتىماقتاستىق پەن جاراسىمعا قۇرىلعان وتباسى قۇندىلىقتارى، ءوڭىردىڭ تابيعي بايلىقتارى، الەۋمەتتىك-ەكونوميكالىق دامۋى سيپاتتالادى.

جالپى ساۋلەتشىلەرمەن سۋرەتشىلەر اراسىندا وبلىستىڭ راسىمىنە لايىقتى نۇسقاسىن ازىرلەۋ بايقاۋى ءوڭىر باسشىسىنىڭ 1999 جىلدىڭ 19 ناۋرىزداعى وكىمىمەن جاريالانعان ەكەن.

ال بايقاۋ جەڭىمپازى بولىپ تابىلعان ساۋلەتشى سالاۋات دەمباي دا جامبىل وبلىسىنىڭ تۋماسى. ول 1975 جىلى قازىرگى ق.ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ ساۋلەت-قۇرىلىس فاكۋلتەتىن بىتىرگەن. ساۋلەتشى رەتىندە جامبىل وبلىسىنىڭ قالا قۇرىلىسى سالاسىندا قىزمەت ەتىپ، ونىڭ ساۋلەتتىك كەلبەتىن جاقسارتۋ ىسىندە ءىز قالدىرعان تۇلعا. سونداي-اق ءار جىلدارى جامبىل وبلىسىنىڭ قۇرىلىس كوميتەتىن باسقارىپ، اۋەلى تاراز قالاسىنىڭ كەيىننەن تۇتاس وبلىستىڭ باس ارحيتەكتورى بولعان. سوندىقتان دا ساۋلەتشىنىڭ وبلىستىڭ ەلتاڭباسىن جاساۋ كەزىندە ونىڭ الەۋمەتتىك-ەكنوميكالىق ومىرىنەن جان-جاقتى حاباردار بولعانىن سەنىممەن ايتۋعا بولادى.

ول جامبىل وبلىسىنىڭ ەلتاڭباسىنىڭ اۆتورى بولۋىمەن بىرگە تاراز قالاسىنداعى «ھيبباتۋلا تارازي» ورتالىق مەشىتىمەن، اۋليەاتا شاھارىنىڭ كىرەبەرىس قاقپاسىمەن، ساياسي قۋعىن-سۇرگىن قۇرباندارىنا ارنالعان ەسكەرتكىشتەردىڭ جوباسىن جاساعان. ساۋلەتشى رەتىندە تاراز قالاسىنىڭ ورتالىق الاڭىندا تۇرعان بايدىبەك ەسكەرتكىشى مەن ءقازىر «ەرلىك» مەموريالدى كەشەنىنە كوشىرىلگەن باۋىرجان مومىش ۇلىنىڭ ەڭسەلى ەسكەرتكىشىنىڭ جوباسىندا قولتاڭباسىن قالدىرعان. مۇنان بولەك وبلىستاعى ءبىرقاتار اۋدان ورتالىعىنداعى جامبىل جابايەۆ، تۇرار رىسقۇلوۆ، كەنەن ازىربايەۆ ەسكەرتكىشتەرىنىڭ دە اۆتورى بولىپ تابىلادى.